Tany amin’ny taona 1959 no efa nisy lahika tsara sitrapo, nanam-piniavana ary nentanim-pinoana sy fitiavana, nahatsapa fa mila fanampiana sy toro-làlana ireo tanora hiroso amin’ny fanambadiana ka nanangana ny Centre de Préparation au Mariage (CPM) niaraka tamin’ireo Pretra vahiny
Hita teo anivon’ny Eglizy fa nisy karazam-pikambanana maro ho an’ny lahika fa tsy nisy kosa ho an’ny mpivady. Teo dia teraka teto Antananarivo ny FFTK (Fandrosoana sy Fivoaran’ny Tokantrano Kristianina) ny 11 Febroary 1967. Tany Fianarantsoa kosa dia ny FNTK (Fivondronan Ny Tokantrano Kristianina). Samy mitovy ny tarigetra sy ny fomba fiasan’izy roa ireo.

Nihaona ny FFTK sy FNTK, ary nifampidinika ka niombon-kevitra fa mety ny hanambarana ho iray ny fikambanana, satria iray ihany ny zava-kendrena sy ny tanjona tiana ho tratrarina eo anivon’ny fiangonana sy ny fianakaviana.
Tamin’izany no naterahan’ny Fivondronan’ny Tokantrano Kristianina (FTK). Manana logo, hira faneva manavaka azy izy ary napetraka ara-panjakana ny fijorony tamin’ny 07 Jona 1974.

Niasa mangina tany ny FTK, ny Fiangonana koa araka ny fombany dia tsy maintsy maka fotoana sy manadihady ka ny taona 1982 vao nankatoavin’ny Fivondronamben’ny Eveka eto Madagasikara ho isan’ny Fikambanana Masina eo anivon’ny Fiangonana Katolika izy. Ny Alahady voalohany aorian’ny Noely no nofidiana hankalazana ny Fianakaviana Masina mpiaro ny fikambanana.

Ny Taona 2017 no nankalaza ny faha-50 taona niorenany ny FTK eo anivon'ny EKAR. Tao amin'ny FTMTK Ambohipo no nakalazana izany, izay natrehin'ireo mpikambana maro avy amin'ny lafy valon'ny nosy